طبقت كريم كراميل ميكاب ارتسيت وكان روعة جدا جدا تبارك الله
الله يحميك حبيبتي كل وصفاتك تمام
بس لاحظت ملاحظة صغننة انه الطبق بالبيض الكبير يكون متماسك مرة ما حبيته كذا لكن بالبيض المتوسط يكون طري ومتماسك
ومرة استغنيت عن الفانيلا وحطيت روح البرتقال وكانت كمان لزيزة
الكريم كراميل ( المطبوخه )
شخصياً أحب الغلبه والتعب والأرهاق , إلا هالشيء متأصل بعروقي ماأحب إلا التعب , لأن عندي نظره أن الأكل الحلو دائماً يكون ممزوج برائحة التعب <=== أبوك يالفلسفه من جد مالي داعي .
بطلتوا بالمطبخ صح !!
لا تخافون الوصفه مره مره سهله , بس يبيلها شوية حرص وتفتيح عيون .
طبعاً الكريم كراميل أصلها أسباني , وأختلفت كل طريقه بكل دوله
والفرنسيين يسمونها الفلان فلان <=== مهوب فلان الفلاني لأ يعني flan وهالأسم أشتقاق ألماني بالأساس
ولما نتابع الأفلام الأمريكيه دايماً تلقونهم يقولون فلان , أو حتى بالمطاعم الأوربيه هنا يطلقون عليها فلان , بس دائماً يحاولون يفهمونا ويكتبون بين قوسين cream cramel
وفيه أشتقاقات كثيره من الكريم كراميل , وأولهم الكريم بروليه وراح أنزلها بحول الله بقسم الأطباق لأن طريقة تقديمها يبيلها شوية حرفيه
ومن ثم الكاسترد والبودنج وهلم جرا من هالأنواع .
المقادير :
فديتكم ركزوا زين , يعني لو أقول ملم هوا ملم , الكريم كراميل حساسه للغايه
حبتين بيض حجم متوسط ( لو صغير حطي 3 حبات بيض , ولو كبير مو مشكله حطي أثنين )
كوبين حليب بودره
كوبين ونصف ماء فاتر ( يعني لاهو حار ولا بارد معتدل)
نصف كوب سكر
ملعقه صغيره فانيلا سائله ( إذا ماتوفرت حطي فانيلا بودره أو مايسمى سكر الفانيلا)
لعمل الكراميل :
ثلاث أرباع بيالة شاي سكر
الطريقه :
نقوم بحرق السكر , أنا أستخدمت قالب تيفال ( المخصص للتوست والباوند كيك ) , ولك مطلق الحريه تستخدمين الأناء إللي تضمنين فيه عدم إلتصاق الكريم كراميل ..
أحياناً أستخدم أواني البايركس , ولكن ماأستخدم الأواني المعدنيه العاديه بسبب أنها تكثر الفقاعات الموجوده على سطح الكريم كراميل
بهالقالب أضفت نصف بيالة شاي من السكر , وممكن تزيدين كمية السكر حسب أتساع حجم صينيتك وذوقك .
أثناء حرقك للسكر على اللهب المباشر , حركي الصينيه , بدون ملعقه ولا شيء , بس وزعي الحراره عليها من جهه إلى جهه, واللهب يكون عالهادي.
وأحذري أنه يحترق , الكراميل إذا أحترق راح تحسين دخان بسيط وعيونك راح تدمع , وأيضاً بيكون طعمه مر , وشكله مو حلو , لأنه واجهتنا بالتقديم .
حلو يكون لونه كراميلي ذهبي , إذا صار فاتح كثير لما تقلبين الكريم كراميل بتكون بيضاء ماراح يبين التباين باللون , ولا راح تكون النكهه غنيه , وبالنهايه راجع لذوقك .
بعد الحرق حطيته بسطح المطبخ , عندي السطح رخام , يسرع برودته بسرعه بحيث أقدر أضيف باقي المكونات
ملاحظه :
إذا الآنيه المستخدمه بايركس , أحرقي السكر بشكل مستقل من ثم صبيها بالأواني , وهالخطوه لازم تكون سريعه حتى لا يتجمد الكراميل .
وأيضاً حبيباتي لازم يكون الكراميل سطحه مستوي لو ماأستوى سطحه ممكن يترك ندب وشقوق عالسطح <=== متأثره بالعنايه بالبشره .
بعد كذا بكل سهوله وعشوائيه , حطي البيض والحليب , والفانيلا والماء ( يعني كل المقادير) بوعاء وأخلطيهم
ياقمامير لما تجين تخلطينهم مو تصلحين ميلك شيك , أخلطي بالسرعه الخفيفه أو أستخدمي مضرب يدوي , يعني الشغل هنا يبيله بنوته نعومه أو وحده نايمه وهي تخلط لوووووووول ( حساس بالحيل , كل فقوعه بتطلع بعد النضج ) .
شوفوا بالصوره الجزء الأول فيه نقط صفراء هذي راح نتخلص منها , مو تشوفينها وتقولين ووووع , ولا بذوبها وبخلط .. لا شوي شوي أهم شيء يذوب السكر وينمزج الحليب
وهنا خفقتها مثل الميلك شيك بالجزء الثاني من الصوره, مو صح بس عشان أوريكم , لحد يخفقها كذا أنتبهوا
إذا صارت معك كذا بالغلط , أتركي الخفاقه وجيبي ملعقه وأخلطي برضو مثل النايمه , لين تحسين الفقاعات بدت تتفرق وقفي الخلط .
بهالوقت روحي وشغلي الفرن على درجة 162 درجه مئويه , أو 325 درجه فهرنهايتيه .. ( الحراره أقل من المتوسط )
وأغلي ماء بالغلايه , عشان نبي نصلح حمام مائي .
نجي لنقطه مهمه للغايه وهي الصفايه , بعد ماخلطنا وزينا كل شيء , نبي نزيل أي رواسب وشوائب .
نتذكر البقع الصفراء , ولا ننسى زلال البيض وأتصاله مع المح ( الصفار) الصفايه راح تنقيه لنا , وأيضاً إذا فيه فقاعات راح تفرقها لنا , ولو فيه تكتلات أو بقايا سكر راح تحل مشكلته .
طبعاً نصب الخليط مباشرة من وعاء الخفق إلى الصحن إللي صلحنا فيه الكراميل مروراً بالصفايه ( وتأكدي أن الكراميل صار بارد <=== السكر المحروق أقصد )
بعد ماصبينها نغلفها بالقصدير , ونحط هالصينيه بصينيه أكبر منها , وبهالوقت يكون الماء إللي حطيناه بالغلايه صار جاهز ويغلي غلي
صبيه على الصينيه الفارغه بعد ماحطيتي الصينيه إللي فيها الكريم كراميل بالوسط ( صلحي هالخطوه قرب الفرن عشان لا تحترقين وأنتِ تنقلينها ) , مع التأكد مسبقاً أن الفرن صار له ساخن 10 دقايق .
حبيباتي أنا أعبي المويه بالصينيه الفارغه حوالي الأنش والأنش ونص ( تقريباً 3 سم أو 4 سم ) .
وبس دخليها الفرن , ولا تطلعينها إلا بعد الــ ساعه ( لو فرنك لا سمح الله فيه خطب وتحسين حرارته مو أوكيه يعني يسرب هواء ممكن تزيدين الوقت إلى ساعه و 10 دقائق ) .
فيه وصفات للكريم كراميل تتأكدين من نضجها بغرز سكينه مثلها مثل الكيك
ولكن هالطريقه أمي أخذتها عن أخوها إللي أخذها بدوره من شيف بأحد المطاعم الغربيه , وغرز السكينه مايندرج على هالنوع من الكريم كراميل .
بعد ماتطلع من الفرن , أنتظري حول الساعه قبل ماتدخلينها الثلاجه , والقصدير أفتحيه من أحد الجوانب بحيث البخار مايتجمع على سطحها من ثم يتحول إلى ماء .
بعد الساعه أمشي بشويش بشويش لين توصلين للثلاجه , لا تضحكين ولا تتنفسين <=== تبي تقتلكم الأخت .
ليش قلت هالكلام عشان لا تتطعج المحروسه , أنتبهوا عليها .
وبس أنسوها بعد ليله كامله 12 ساعه أرجعوا لها , شخصياً أفضل أكلها وقلبها بالقالب بعد يوم كامل ( أحبها بارده للغايه )
قبل لا تقلبينها أضغطيها من الأطراف بحيث تنزل بسرعه عند القلب
من ثم جيبي صحن التقديم وحطيه فوق الصينيه , وأقلبيها وهزيها حبتين ( صلحي هالحركه وأنتِ عند المغسله عشان لا تحوسين مطبخك بحال أنزلقت الكريم كراميل بشكل مفاجيء ) , برضو أمشي بشوي وأنتِ رايحه للمغسله <=== مسختها صح لوولوووووول
وبس النتيجه مثل كذا تماماً
شوفوا كيف ناعمه من الداخل
طبعاً إللي تخاف من ريحة البيض أقولها لا تخافين أبداً , أنا من البنات إللي ماأحب ريحة البيض , ودخوله الفرن وخلطه مع الفانيلا ونسبة الحليب كافيه للقضاء تماماً على نكهته ..
كان ودي أحط لكم صوره كامله للكريم كراميل , فضطريت أصلح وحده جديده اليوم وبرجع أضيفها بالموضوع , ولكن طلعت من البيت ورجعت لقيت أخواني ياحليلهم قلبوها وأكلوا ثلاث أرباعها مابقى إلا هالربع إللي صورته من ثم أكلته لووووووووول
وبالعافيه عليكم , بكذا نكون خلصنا الدرس الثالث , أتمنى يكون سهل عليكم وأكون خفيفة دم على قلوبكم .
الرئيسية 
